Námsleyfi grunnskólakennara 2009-2010
Grunnskólakennarar - skólastjórnendur

Umsóknarfrestur um námsleyfi grunnskólakennara og stjórnenda grunnskóla fyrir skólaárið 2009-2010 er til  og með 10. október 2008.

Stjórn sjóðsins hefur ákveðið að við úthlutun verði sett í forgang nám sem tengist kennslu í

íslensku,
íþróttum og heilsufræði
náttúrufræði og umhverfismennt
Skal allt að 1/3 námsleyfa úthlutað vegna þessa.

Umsækjandi, sem æskir námsleyfis, skal fullnægja eftirfarandi skilyrðum og skuldbindingum, sbr. reglur Námsleyfasjóðs:

a) Hafa gegnt kennslustarfi í 10 ár samtals, í eigi minna en hálfu starfi, og verið í starfi sl. fjögur ár.
b) Vera fastráðinn starfsmaður sveitarfélags eða aðila sem stofnað er til með samstarfi sveitarfélaga og taka laun samkvæmt kjarasamningi Launanefndar sveitarfélaga og Kennarasambands Íslands vegna grunnskólans.
c) Ljúka 30 eininga háskólanámi (60 ECTS) eða sambærilegu námi, miðað við 1/1 námsleyfi, og skal námið miða að því að nýtast viðkomandi í því starfi sem hann er ráðinn til að sinna.
d) Skuldbindi sig til að starfa að kennslu við grunnskóla eða að öðrum skólamálum í þágu sveitarfélaga í a.m.k. þrjú ár að námsleyfi loknu.
e) Senda Námsleyfasjóði skýrslu um störf sín og nám í námsleyfi innan fjögurra mánaða frá því að námsleyfi lauk. Skýrslan skal miðuð við að unnt sé að birta hana síðar og áskilur Námsleyfasjóður sér rétt til þess.
f) Enginn getur fengið hærri fjárhæð í námsleyfi en sem nemur tveggja ára föstum launum á starfsævi viðkomandi.
g) Laun í námsleyfi miðast við starfshlutfall námsleyfisþega næsta ár áður en námsleyfi hefst eða meðaltal síðustu þriggja ára ef það er hærra.
Umsóknum skal skilað til Sambands íslenskra sveitarfélaga, Borgartúni 30, Reykjavík fyrir 10. október 2008 á eyðublöðum sem þar fást og gilda fyrir skólaárið 2009-2010.

Umsóknareyðublöð Námsleyfasjóðs.